ജി.എം ന്യൂസ് റിപ്പോർട്ടർ:- ഷാജി വർഗീസ് കലയപുരം.
ലോകത്ത് കോവിഡ് വ്യാപനം വീണ്ടും രൂക്ഷമായേക്കുമെന്ന മുന്നറിയിപ്പുമായി ലോകാരോഗ്യ സംഘടന.
യൂറോപ്പിലും ഏഷ്യയിലും വര്ധിച്ചു വരുന്ന കോവിഡ് കേസുകള് മേഖലയെ വീണ്ടും കോവിഡിന്റെ പ്രഭവകേന്ദ്രമായി മാറ്റിയേക്കുമെന്നാണ് ലോകാരോഗ്യ സംഘടന അറിയിക്കുന്നത്.
78 മില്ല്യണ് കോവിഡ് കേസുകളാണ് യൂറോപ്പ് മേഖലയിലുള്ളത്.
തെക്ക് കിഴക്കന് ഏഷ്യയിലും കിഴക്കേ മെഡിറ്ററേനിയനിലും പടിഞ്ഞാറന് പസഫിക്-ആഫ്രിക്കന് മേഖലയിലും റിപ്പോര്ട്ട് ചെയ്യപ്പെട്ട കേസുകളേക്കാള് കൂടുതലാണിത്.
കഴിഞ്ഞയാഴ്ച ലോകത്ത് റിപ്പോര്ട്ട് ചെയ്ത ആകെ കോവിഡ് മരണങ്ങളില് പകുതിയും മധ്യേഷ്യയില് നിന്നാണെന്നും ലോകാരോഗ്യ സംഘടന വിലയിരുത്തുന്നു.
ഏതാനും ആഴ്ച്ചകളായി യൂറോപ്പില് റിപ്പോര്ട്ട് ചെയ്യുന്ന കേസുകളില് വന് വര്ധനവാണ് രേഖപ്പെടുത്തുന്നത്.
ശൈത്യകാലം ആരംഭിച്ചതോടെ അടച്ചിട്ട മുറികളിലുള്ള സംഘം ചേരലുകള് കൂടിയതും നിയന്ത്രണങ്ങള് പിന്വലിച്ചതുമാണ് രോഗവ്യാപനം വര്ധിക്കാന് കാരണമെന്നാണ് വിദഗ്ധര് പറയുന്നത്.
ഇതേ നിലയിലാണ് രോഗ വ്യാപനം തുടരുന്നതെങ്കില് മധ്യേഷ്യയിലും യൂറോപ്പിലും മാത്രം അടുത്ത ഫെബ്രുവരി ഒന്നിനുള്ളില് അഞ്ച് ലക്ഷം കോവിഡ് മരണങ്ങള് സംഭവിച്ചേക്കാമെന്ന് ലോകാരോഗ്യസംഘടന യൂറോപ്പ് മേഖലാ ഡയറക്ടര് ഹാന്സ് ക്ലൂജ് മുന്നറിയിപ്പ് നല്കി.
